إلك

 

 

كلها إلك يا حبيبي..لما تنسى عيوني قسوتها وتصير نظرتها ناعمة..هاي النظرة مو إلهم..إلك..حتى لو ما عم تشوفني..لما عقلي بينفعل وتبين اللهفة بصوتي..هاي اللهفة إلك..لما بكون قاعدة لحالي وعم بشتغل ومركزة وفجأة ببتسم..هاي البسمة مو بس إلي..إلك..لما أكون مبسوطة بكون رضيانة عن موقفي معك ووضع علاقتي فيك..ولما تشوف حالك علي..بتمنى ما شوفك طول النهار..عشان ما أزعل منك كمان..

 

يا سيدي ولما تتأخر وينقضي اليوم ساعة ساعة وما تيجي بقلق..وبوقف شغل..وبوقف ضحك وهبل..وببطل قادرة آخد وأعطي حتى وأنا بحاول..وما بعود قادرة حتى استقبل كلمة..وبصير أقيس الممرات..هادا القلق إلك..

 

أنا من عادتي باردة وما بتأثر بسرعة ولا بحس كتير..بس أحياناً بيصيبني خوف قوي منك..وهو الخوف اللي خلاني أهواك من الأول..وشعور قوي بأني انتصرت لما أضايقك..وبشتاقلك كتير لو بنص الليل بحس إنو لازم أشوفك لحتى أكمل لتاني يوم طبيعي..كل المشاعر القوية اللي ممكن تصيبني إلك..

 

أفكاري..حتى مرات وأنا عم صلي بتكون إلك..وخيالي إلك..وحقدي إلك..وغيرتي إلك..وإصراري إلك..وحبي المجنون إلك..وهلأ عم بكتب إلك..ومدونتي إلي..بس إلك..

 

هي مين؟؟ كيف التقيتو وليه هيك صار؟؟إذا انت إلها مو مشكلة..بعرف إنو مو كلك إلها..بس أنا إلك..ليش..لأنه أطراف روحي معلقة بأشياء كتير..بس هايمة فيك ورايحة إلك..الجزء الأساسي من روحي إلك..

 

 

 

أنا تصالحت مع حالي وعرفت أنا ليه كنت تعبانة..لأني بعارض إشي موجود..رضيت فيه أو حاربته ما بقدر ألغيه..بحبك وما بدي..بدي تعطيني عشان أرضى..اكتشفت إني أنانية لأني عم بحبس كل شي جوا..وحالي من جوا فاض وتعبان..

 

أنا تصالحت مع حالي وقررت أعطي على طبيعتي..بحبك وكياني صارمربوط مع هاد الحب..والطبيعي أتصرف على هاد الأساس مو أمشي عكس كل شي فيّ..رح أعيش بالضبط هيك وأحبك قد ما فيّ حب إلك..وإذا ما بدك إنت حر..ما دخلك فيّ أنا هيك مبسوطة..ومبسوطة بسببك يا حبيبي..مو إلك...